Siglir tar il cuntegn

Exteriur Usbekistan porscha maun a New York suenter l'attatga

Suenter l'attatga a New York vul l'Usbekistan sustegnair ils Stadis Unids. Ses pajais veglia nizzegiar tuttas resursas per gidar tar las investigaziuns, ha declerà il president Schawat Mirsijojew en ina scriver da condolenza al president american Donald Trump.

Autos e bus demolids.
Legenda: Il NYPD ha confermà in incident cun in auto. Keystone

Tenor il guvernatur dal stadi federativ New York, Andrew Cuomo, aveva l'attentader colliaziuns cun la milissa terroristica Stadi Islamic. El saja sa radicalisà en ils Stadis Unids.

Iran sentenzia

L'Iran ha sentenzià cun pleds recents l'attatga terroristica e condolà a las famiglias da las unfrendas. «Mazzar carstgauns innocents e senz'agid sin vias e plazzas publicas mussia la brutalidad da la gruppa terroristicas sco il Daesch (num iranais per SI)» ha ditg Bahram Ghaseemi, il pledader dal ministeri da l'exteriur. Il medem mument ha el dentant er crititgà la politica dals Stadis Unids e ses alliads en il cumbat cunter il Stadi Islamic.

Il mardi saira è l'attentader charrà a Manhattan en peduns e velocipedist. Almain otg persunas èn mortas. La polizia ha arrestà il manischunz da 29 onns suenter in sajettim. Tenor rapports da medias è l'um vegnì il 2010 en ils Stadis Unids e che viva legalmain en l'America.

Sco quai ch'il president da la citad, Bill de Blasio ha communitgà, sajan pliras persunas vegnidas blessadas. La polizia federala FBI tracta l'incident sco in act terroristic.

Il president dals Stadis Unids è vegnì infurmà davart l'attatga a New York. En in'emprima reacziun ha el condemnà l'attatga cun vehemenza. Tenor Trump sa tractia probabel d'in'ulteriura attatga d'ina persuna fitg malsauna e disturbada. Pli tard ha el communitgà ch'el veglia abolir la «lottaria da Green Cards». Mintg'onn vegnan radund 50'000 persunas estras en ils Stadis Unids grazia ad ina tala Green Card.

RR novitads 22:00++