Siglir tar il cuntegn
Inhalt

Exteriur USA: Trump vul reducir las taglias

Ad in'occurrenza a Detroit ha il candidat republican per il presidi dals Stadis Unids preschentà ses program economic. Il medem mument survegn el concurrenza dad in ulteriur candidat republican per la Chas'alva.

Politicher american.
Legenda: Donald Trump empermetta da sbassar las taglias. Keystone

En ils Stadis Unids ha il candidat republican Donald Trump preschenta ses program d’economia: En cas ch’el vegnia president, na stoppia nagin’interpresa americana pajar dapli che 15% taglia sin sias entradas. Quai ha Trump ditg en in pled a Detroit.

En l’avegnir duaja mo pli dar 3 categorias da taglia sin las entradas cun ina tariffa maximala da 33%. Plinavant veglia el ordinar in moratori per novas regulaziuns ed abolir la taglia l’ierta. Fin ussa ston ils Americans pajar taglia sin iertas da passa 5,5 milliuns dollars.

McMullin candidescha er per ils republicans

Chas'alva.
Legenda: Trump survegn concurrenza ord las atgnas retschas en la cursa per la Chas'alva. Quai en furma da Evan McMullin. Keystone

En la cursa per il presidi dals Stadis Unids survegn Donald Trump concurrenza ord las atgnas retschas: Il republican Evan McMullin, ha annunzià da candidar il november. McMullin ha 40 onns ed ha lavurà tar il servetsch secret CIA sco expert cunter il terror.

Però è el tant sco nunenconuschent al public ed ha cumenzà fitg tard cun ses cumbat electoral. Perquai manegian experts er ch’el na vegnia betg a giugar ina rolla decisiva da las elecziuns presidialas. Dentant demussia quest pass quant fitg che la partida republicana è spartida en vista a la nominaziun da Donald Trump.

Trump adina pli 'non gratus' en l'atgna partida

Numerusas persunalitads republicanas din da Trump ch'el fissia in president privlus. Ad el manchian il caracter, las valurs e l'experientscha per esser president, ha quai num en ina decleraziun. Cun Trump fissian periclitads la segirezza naziunala, il bainstar dals Stadis Unids e la rolla sco autoritad morala e manadra dal mund liber fissia flaivlentada.

Ils 50 experts da segirezza dubitan però era che la democrata Hillary Clinton fiss la dretga presidenta.

RR novitads 22:00/07:00