Siglir tar il cuntegn

Header

cuntegn

Exteriur USA – Texas sut aua

Il hurican «Harvey» ha devastà ed inundà la fin d'emna grondas parts dal sid dal stadi federativ da l'USA Texas. Almain tschintg persunas èn mortas.

Grondas parts dal sid dal Texas èn vegnidas inundadas. Almain tschintg persunas sajan mortas pervi dal hurican Harvey. Quai han communitgà las autoritads localas. Dasper la regiun da la costa sajan era parts da la metropola da Houston vegnidas inundadas. Meteorologs quintan er ils proxims dis cun ferma plievgia. A Houston han ils dus eroports principals stuì vegnir serrads ed in ospital vegnir evacuà. Plinavant sajan 250 vias da transit serradas. Il president dals Stadis Unids Donald Trump vul visitar il mardi la regiun da crisa.

«Harvey» ha cuntanschì il venderdi la costa da Texas cun ina sveltezza da 215 kilometers l'ura. I sa tracta dal pli ferm hurican ch'ha cuntanschì la terra franca da l'USA ils ultims diesch onns. Fitg ferm ha il hurican tutgà il lieu Rockport dasper la costa. Sco il president da la citad, C.J. Wax ha ditg envers l'emettur MSNBC sajan pliras chasas e fatschentas vegnidas destruidas cumplettamain. 3000 commembers da la garda naziunala e quella da Texas sajan mobilisads per gidar.

Per grondas parts da Houston vala il pli aut grad d'alarm tar inundaziuns. La populaziun è vegnida intimada dad ir sin lieus pli auts. Experts quintan cun donns material da pliras milliardas dollars, sumegliant sco suenter il hurican «Katrina» en la Louisiana ed il Mississippi l'onn 2005.

RR novitads 06:00

Artitgels legids il pli savens