Siglir tar il cuntegn

Header

cuntegn

Exteriur USA smanatscha cun sancziuns pli severas vers il Myanmar

Pervia da la violenza vers la minoritad muslima dals Rohingya rinforzan ils Stadis Unids da l'America lur sancziuns e restricziuns envers il Myanmar. Quai ha ina pledadra dal ministeri da l'exteriur a Washington ditg.

Il svilup en la provinza da conflict Rakhine fetschia gronds quitads al ministeri da l'exteriur american. Perquai vul il ministeri rinforzar las sancziuns cunter la regenza dal Myanmar, ed era restricziuns severas per commembers dal militar – sco per exempel ulteriuras restricziuns da viadi.

Mesiras cunter tractament indegn d'in uman

I saja necessari da far responsablas las persunas per lur acts da violenza, saja quai persunas singulas ubain gruppas, sco guardias civilas u acturs che na tutgan betg tar il stadi.

La regenza dal Myanmar stoppia immediat far insatge per mantegnair la segirtad e la pasch sco era procurar per agid umanitar. Plinavant duai il Myanmar pussibilitar als Rohingya da turnar en lur vitgs. Bunamain 600'000 Rohingya èn en fugia dapi la fin d'avust. Lur vitgs e chasas brischads.

Urgenza umanitara

Tenor las indicaziuns da l'ovra d'agid per fugitivs da las Naziun Unidas – UNHCR – è la fugia dals Rohingya ina da las pli grondas urgenzas umanitaras sin l'entir mund. Renfatschas ch'i sa tracti d'ina nettegiada etnica renviescha il Myanmar.

RR novitads 09:00

Artitgels legids il pli savens