Tut ils republicans en il senat han vuschà per Tillerson, fertant che bunamain tut ils democrats han vuschà cunter el. Tillerson è anc vegnì saramentà mesemna saira en la Chas’alva.
Il nov minister da l'exteriur n'ha naginas experientschas politicas. Dentant è el connectà bain sin l'entir mund pervia da las activitads da ses concern. Gievgia beneventa el en sia nova funcziun ses collega d’uffizi tudestg Sigmar Gabriel.
Candidat dispitaivel
Tillerson è però dispitaivel. Quai surtut pervi da sias relaziuns en Russia e cunzunt tar il president Wladimir Putin. Plinavant ha la indemnisaziun da partenza ch’el ha survegnì da ExxonMobil dà da discutar en ils Stadis Unids. Quella munta numnadamain a radund 180 milliuns dollars.
L'econom da 64 onns era vegnì proponì dal president Donald Trump.