Siglir tar il cuntegn
cuntegn

Exteriur USA proclamescha ulteriuras sancziuns cunter Russia

Ils Stadis Unids han decidì ulteriuras sancziuns cunter la Russia. Pertutgadas èn firmas e singulas persunas.

Chas'alva.
Legenda: Gia il mars avevan ils Stadis Unids proclamà sancziuns cunter la Russia. Keystone

Cunter 38 firmas e singulas persunas han ils Stadis Unids proclamà sancziuns. Quai han auts represchentants da la regenza americana communitgà a Washington. Las sancziuns sajan coordinadas cun ils alliads europeics.

Basa per las sancziuns na saja betg in incap spezial, ellas sa basian sin il muster d'activitads maliziusas da la Russia en il mund che creschia adina dapli.

La Russia è sa decidida per in curs da confruntaziun.
Represchentants da la regenza

La sancziuns na sajan dentant betg drizzadas vers la populaziun russa. Ils Stadis Unids sajan interessads da promover ina meglra relaziun cun la Russia. Quai funcziunia dentant mo sche Moskau sa cumportia auter e n'emprovia betg da destabilisar il mund.

Firmas e persunas or da l'ambient da Putin

La sancziuns pertutgan set persunas or dal conturn dal president russ Wladimir Putin 12 firmas ch'èn en lur possess u sut lur controlla.

Tenor las indicaziuns hajan questas persunas ina rolla centrala en l'agir politic dal president.

Betg las emprimas sancziuns

Gia il mars aveva la regenza americana proclamà mesiras da chasti cunter 19 persunas e 5 organisaziuns da la Russia.

RR novitads 16:00