USA pretenda chasti da record da la Deutsche Bank

Pervi da fatschentas dubiusas sto la Deutsche Bank quintar cun in chasti da 14 milliardas dollars da las autoritads americanas. Quai fiss il pli aut chasti ch’ils Stadis Unids han fin uss ordinà cunter ina banca da l’ester.

Turs da la Deutsche Bank a Frankfurt am Main.

Legenda da maletgs: La Deutsche Bank è en il visier da las autoritads americanas. Keystone

La Deutsche Bank ha confermà ch'il ministeri da giustia american pretendia 14 milliardas dollars. La raschun èn vaglias cuvertas cun ipotecas che la Deutsche Bank aveva emess ils onns avant la crisa da finanzas il 2008.

Tenor la banca èsi normal che las pretensiuns èn bler pli autas al cumenzament da las negoziaziuns che quai che vegn decidì a la fin. La Deutsche Bank fadigia pil mument quasi nagut, damai ch'els èn amez ina sanaziun. Els han dentant gia quintà cun in chasti da las autoritads americanas e han per quai fatg reservas per dispitas legalas da 5,5 milliardas euros.

La crisa dal 2008

Il tema da las ipotecas giaja enavos gia sin la crisa da finanzas e na pertutgia betg mo la Deutsche Bank. Bleras bancas grondas hajan gudagnà blers daners cun las immobiglias en ils Stadis Unids. Las bancas han dà ipotecas a famiglias basegnusas e han cun quai scuflà lur fatschenta da credit. Las ristgas sajan vegnidas dadas enavant ad investiders. Quai en furma dad emprests fitg cumplex che han procurà per autas taxas en favur da la banca.

Cura ch'il martgà e collabà il 2007 saja sa mussà che questas obligaziuns eran senza valita. Blers clients èn sa sentids cugliunads ed èn ì avant dretgira. Là hajan els survegnì raschun.

RR novitads 06:00