USA: mort da derschader dal supreme court agita la politica

Antonin Scalia, il derschader dal supreme court dals Stadis Unids, è enconuschent d’esser fitg conservativ. Uss è Scalia mort nunspetgadamain en la vegliadetgna da 79 onns. La nova da sia mort ha gia inflammà en la politica americana ina debatta intensiva davart la successiun.

Il derschader dal supreme court gist mort, Antonin Scalia.

Legenda da maletgs: Fitg conservativ e dapi il 1986 en uffizi: Il derschader dal supreme court gist mort, Antonin Scalia. Reuters

Gia curt suenter la mort dal derschader dal tribunal suprem dals Stadis Unids, Antonin Scalia, datti ina debatta politica davart la successiun da ses uffizi al supreme court.

I va per bler

Ina dumonda principala è, schebain la fracziun conservativa po tegnair la maioritad en il gremi dals nov derschaders. Ils republicans pretendan gia paucas uras suenter la nova da la mort da Scalia, che president Barack Obama desistia d’ina nominaziun en ses ultim onn d’uffizi. Il proxim president duaja reglar la successiun da Scalia.

Laschar ir video «Obama nimmt Stellung zum Tod von Richter Scalia (unkomm.)»

Obama s'exprima davart la mort da derschader Scalia (nuncommentà)

0:46 min, dals 14.2.2016

La decisiun vegn ad avair consequenzas da gronda purtada per ils Stadis Unids. Tar dumondas dispitaivlas sco ils dretgs d’omosexuals, las leschas d’armas u l’abort han ils derschaders suprems stedi l’ultim pled en chaussa. Areguard la politica d’immigraziun ed il cumbat cunter la midada dal clima mancan entant las sentenzias per ils decrets che Obama ha dispensà.

RR novitads 06:00