Siglir tar il cuntegn
Inhalt

Exteriur USA: FED auza tschains directiv

L’institut d’emissiun dals Stadis Unids FED augmenta il tschains directiv. Quai per in quart punct sin 1,25 fin 1,5%. Quai damai che l’economia sa sviluppeschia a moda positiva ed er la situaziun al martgà da lavur saja vegnida meglra. Quai ha ditg la presidenta partenta da la FED, Janet Yellen.

Purtret da Janet Yellen.
Legenda: Janet Yellen auza il tschains directiv da la FED. Keystone

Cun questa midada dal tschains directiv s’augmenta il tschains cun il qual las bancas dattan credits a curta vista gia per la terza giada quest onn. Ils martgads avevan quintà cun quest augment. L’institut d’emissiun american cuntinuescha uschia sia politica monetara che duaja sa normalisar suenter in decenni da tschains extrem bass en consequenza da la crisa da finanzas.

Igl è probabel stà l’ultim augment dal tschains directiv sut il timun da Yellen. Ella sa retira numnadamain l’entschatta da favrer 2018. Ses successur daventa Jerome Powell ch’era vegnì nominà dal president american e silsuenter confermà dal senat.

RR novitads 06:00