Siglir tar il cuntegn

Exteriur USA expulsescha 60 diplomats russ

L'affera internaziunala enturn l'attatga da tissi sin l'anteriur spiun Skripal vegn pli critica. En in'acziun cunvegnida chatschan 14 pajais da l'Uniun europeica, l'USA, il Canada e l'Ucraina divers diplomads ord pajais.

Il president da l'EU Donald Tusk.
Legenda: Il president da l'EU Donald Tusk. Keystone

Ils Stadis Unids chatschan or da pajais 60 diplomats russ. Quai pervi da l’attatga da tissi sin l’anteriur agent dubel russ, Sergej Skripal, e sia figlia en la Gronda Britannia. Plinavant vegnia il consulat russ a Seattle serrà, ha communitgà la Chas’Alva.

En tut expulseschan er 14 pajais da l'Uniun europeica diplomats russ. Quai ha communitgà il president da l'UE Donald Tusk a Warna en la Bulgaria. Tar ils pajais europeics che portan questa decisiun tutgan tranter auter la Germania, la Frantscha, l'Italia, ils Pajais Bass, la Tschechia, la Pologna, il Danemarc, la Finlanda ed ils pajais baltics. Ulteriuras sancziuns na sajan betg exclusas ils proxims dis.

Il minister da l'exteriur da la Germania, Heiko Maas, ha declerà che questa decisiun na saja betg stada da levsenn. La Russia na gidia però anc adina betg a sclerir l’attatga da tissi.

RR novitads 17:00