Siglir tar il cuntegn

Exteriur USA e Tirchia vulan collavurar en la Siria

Ils Stadis Unids e la Tirchia vulan normalisar lur relaziun tendida e collavurar. Quai han ils ministers dal exteriur dals pajais communitgĂ  tar ina conferenza da pressa communabla.

Ministers da l'exteriur dals Stadis Unids e da la tirchia.
Legenda: Ils partenaris da la NATO na vulan betg pli far acziuns singulas. Keystone

Tranter ils Stadis Unids e la Tirchia datti dapi intginas emnas grondas tensiuns perquai che la regenza ad Ankara ha lantschà in'offensiva cunter la milissa da curds YPG.

Uss vulan ils dus pajais dentant normalisar lur relaziun e collavurar meglier. Quai ha il minister dals Stadis Unids Rex Tillerson e ses collega d’uffizi tirc Mevlüt Cavusoglu communitgà. Ins haja las medemas finamiras en la Siria: cumbatter la milissa da terror Stadi islamic e stabilisar il pajais per ch'ils fugitivs possian turnar en in pajais democratic ed unì. Perquai vulan ils Stadis Unids e la Tirchia collavurar en futur. I dettia naginas decisiuns singulas dals partenaris da la NATO pli. Quai dentant mo sche la milissa curda YPG sa retiria ord la citad Manbidsch al cunfin siric cun la Tirchia.

Problematica enturn la YPG

La milissa curda YPG è il punct dispitaivel tranter Washington ed Ankara. Ils Stadis Unids sustegnan la YPG en il cumbat en Siria cunter la milissa da terror stadi islamic. La Tirchia perencunter vesa en la YPG in'organisaziun terroristica e vul impedir ch’ella influenzeschia ils curds en Tirchia.

RR novitads 15:00