Siglir tar il cuntegn
Inhalt

Exteriur USA: Cravals a Milwaukee

Danovamain han policists en ils Stadis Unids sajettà giu in um suspectus en ina controlla da traffic. Silsuenter è la situaziun escalada. Entant ha il guvernatur rinforzà las mesiras da segirezza.

In auto che arda en la notg.
Legenda: A Milwaukee arda in auto en il curs da las demonstraziuns pervi dad in um mazzà da la polizia. Keystone

Suenter ils grevs cravals en la citad americana Milwaukee ha il guvernatur dal stadi da Wisconsin clamà en agid la garda naziunala.

Tenor la polizia saja sa furmada ina fulla vilada da radund 100 persunas che haja bittà crappa sin la polizia. In auto da pulizia ha ars. Plinavant haja in tancadi piglia fieu – sco la polizia scriva sin twitter. Er saja vegnì sajettà.

L'um sajettà en la controlla da traffic

Daco che la polizia ha sajettà giu l’um da 23 onns n’è anc betg enconuschent. Tenor la polizia haja l'um gì in'arma engulada e saja fugì durant la controlla. Davart las colurs da pel – tant da l'um sajettà sco era dal policist - na datti anc naginas indicaziuns.

Tensiuns dapi dus onns

Dapi dus onns chaschunan acts da violenza da la polizia envers supectus tensiuns en in Stadis Unids - uschia a Baltimore u Ferguson en Missouri. Critichers renfatschan a la polizia da disfavurisar afroamericans. Ils eveniments han dà schlantsch al moviment internaziunal «Black Lives Matter» e giogan era ina rolla en il cumbat electoral american.

RR novitads 12:00