«Il temp po mitigiar l'intensitad dal trauma, las sgarschaivlas regurdientschas restan dentant», ha ditg l'anteriur rectur da la scola, Ron Mitchell tar la ceremonia a Littleton. «La forza e resistenza da questa vischnanca ha dà a nus speranza.» Er anteriurs scolars ed il guvernatur dal stadi federativ Colorado, Jared Polis han tegnì in pled en in parc dasper la scola da Columbine. L'ex president Bill Clinton ch'è stà president cura che l'amoc è capità è s'exprimì en in video.
Sgarschur en l'entir mund
Ils 20 d'avrigl 1999 han dus teenagers sajettà giu 12 scolars ed in scolast. Ulteriurs 24 scolaras e scolars eran vegnids blessads. Suenter l'amoc han ils dus giuvenils commess suicidi. L'act da sgarschur ha commuventà l'entir mund ed ha era chaschunà debattas davart leschas d'armas en ils Stadis Unids. Ord vista d'observaders n'è dentant betg capità bler dapi lura. Adina puspè datti en ils Stadis Unids tals amocs.
L'eveniment è er stà raschun per il film documentar critic «Bowling for Columbine» da Michael Moore. Quel è vegnì onurà il 2003 cun in Oscar.
Lingias grossas avant paucs dis
Be avant paucs dis è la scola da Columbine puspè stada en las lingias grassas. L'FBI ha tschertgà ina giuvna armada da 18 onns che aveva smanatschà cun violenza encunter la scola. Ella haja sco quai che la polizia ha infurmà, gì in'obsessiun cun l'amoc da Columbine. Chattà ella ha la polizia morta. Ils investigaders supponan ch'ella haja mazzà sa sezza.
RR novitads 10:00