Blers utilisaders han reclamà perquai ch'els èn quasi vegnids sfurzads da midar lur sistem operativ sin Windows 10. Anc quest'emna vul Microsoft publitgar ina versiun optimada ch'offrescha cleras opziuns per midar sin Windows 10 u betg, sco il concern american scriva.
Blers utilisaders avevan reclamà, perquai che l'upgrade aveva cumenzà fin uss automaticamain - quai cun smatgar sin il X da la fanestra dal menu. Davent da l'avust 2016 duai l'upgrade sin Windows 10 custar var 120 francs.
Il mais passà ha Microsoft paja 10'000 dollars ad in'utilisadra americana per reglar ina dispita giuridica. La dunna ord la California aveva purtà plant cunter Microsoft, perquai che ses computer n'ha betg pli funcziunà durant plirs dis suenter ch'ella aveva stuì far in upgrade. Microsoft ha però suttastritgà che quest pajament na saja betg stà ina confessiun da culpa davart il concern.
RR novitads 12:00
