La regiun sa dosta e di ch'uschia sa midia lavandra d'in product natiral ad in tissi e sa tschentia ensemen cun materia sintetica sin ina glista naira da l'UE. Dasperas saja lavandra l'olma da la Provence ed in patrimoni natiral regiunal.
Radund 1700 purs cultiveschan sin 30'000 hectaras lavandra. 9'000 plazzas da lavur dapendan directamain, 17'000 indirectamain da la cultivaziun e dal turissem da la lavandra. Blers teman che producents da cosmetica pudessan midar sin auters products sch'ils custs creschian memia fetg pervia da novas regulaziuns.
L'UE na veglia betg scumandar lavandra, di Franck Arrii, il pledader da la represchentanza da la cumissiun da l'UE en Frantscha. Il schurmetg da populaziun ed ambient saja la finamira da l'adattaziun da reglas existentas che cuntegnan gia ielis eterics sco substanzas chemicas I saja memia baud per dir sch'i dettia novas regulaziuns per producents d'ielis. L'emprim sboz da las novas reglas vegnìa probablamain per fin 2022.
