Siglir tar il cuntegn

Header

cuntegn

Exteriur Uniun europeica convochescha sesida da crisa

Suenter la tragedia d'in bastiment da fugitivs en la Mar mediterrana, ha l'Uniun europeica convocà ina sesida da crisa.

Tar la cupitgada d'in bastiment da fugitivs en la Mar mediterrana pudessan fin 700 persunas esser mortas. Tenor diversas agenturas da novitads haja il bastiment annunzià la notg problems a la guardia da costa.

En la vischinanza era in bastiment da cisterna portugais. L'equipa da quest bastiment ha rapportà ch'il bastiment da fugitivs saja cupitgà avant lur egls. 28 persunas hajan pudì vegnir salvadas vivas. Entant èn era las emprimas baras salvadas.

In tozzel bastiments ed aviuns èn en acziun. Il bastiment è cupitgà en il nord da la costa da la Libia.

UE convochescha sesida da crisa

Suenter la catastrofa da fugitivs en la Mar Mediterrana, ha l'Uniun europeica convocà ina sesida da crisa. La cumissiun da l'UE saja consternada profundamain da la disgrazia. Ils ministers da l’intern e da l'extern dals pajais da l'UE duain vegnir ensemen. I giaja cunzunt per lavurar ensemen cun ils pajais d'origin e da transit per impedir ch'ils fugitivs fetschian insumma il viadi privlus sur la Mar Mediterrana.

La delegada da l'exteriur da l'UE, Federica Mogherini ha prentendì dapli protecziun da fugitivs areguard l'ultima catastrofa da fugitivs en la Mar mediterrana.

RR novitads 11:00/15:00

Artitgels legids il pli savens