Ungaria: schuldads duain segirar cunfins dal sid

En vista a la crisa da fugitivs en l'Europa ha il primminister da l'Ungaria, Victor Orban annunzià da segirar ils cunfins tar la Serbia cun policists e schuldads a partir dal settember, quai permess ch'il parlament dia gea.

cunfins ungaria-serbia

Legenda da maletgs: Schuldads ungarais sper la saiv da filfier cun spinas al cunfin ungarais-serb. Keystone

Ordavant aveva il pajais chalà da transportar fugitivs al cunfin austriac. L'acziun saja stada ina chaussa unica per mitigiar ina situaziun d'urgenza. Entant han passa 7’500 fugitivs surpassà il cunfin austriac ed èn da viadi cun trens spezials en Germania.

UNHCR lauda politica da la Germania e da l'Austria.

L'ovra d'agid per fugitivs da las Naziuns Unidas, UNHCR lauda la Germania e l'Austria. La gronda prontadad da gidar dals burgais saja remartgabla, scriva l'UNHCR.

L'ovra d'agid beneventa ch'ils dus pajais laschian entrar millis da fugitivs or da l'Ungaria. Quai demussia la forza da la direcziun politica che sa basia sin valurs umanitaras. Ordavant aveva l'incumbensada da l'ONU per dretgs umans ditg che la crisa da fugitivs en l'Europa cuzzia anc uschè ditg sco il conflict en Siria.

RR novitads 17:00