Siglir tar il cuntegn
cuntegn

Exteriur Ungaria e Slovachia ston acceptar fugitivs

L'Ungaria e la Slovachia ston recepir fugitivs er cunter lur veglia. Quai ha decidì il tribunal da la Communitad europeica a Luxemburg decidì. Las regenzas a Budapest e Bratislava avevan purtà plant cunter l'obligaziun da recepir fugitivs ch'ils stadis da l'UE avevan concludì.

bajetg da dertgira, davant ina tavla cun l'inscripziun "cour de justice"
Legenda: Il tribunal da la Communitad europeica ha decidì cunter ils dus pajais. Keystone

I va per fin a 120'000 fugitivs da la Grezia e l'Italia. Cun questa mesira vulan ils auters stadis da l'UE distgargiar ils dus pajais. La decisiun è crudada cunter la veglia da l'Ungaria, la Slovachia, la Tschechia e la Rumenia.
L'advocat general da l'UE, Yves Bot, aveva en sia posiziun gia la fin da fanadur cusseglià da laschar crudar il plant dals dus pajais. En ils pli blers cas suondan ils derschaders da Luxemburg a las recumandaziuns dals advocats generals.
Sche l'Ungaria, la Slovachia u auters pajais da l'UE sa dostan vinavant da recepir fugitivs pudess la cumissiun da l'UE instradar ina procedura da violaziun dal contract. Cunter l'Ungaria, la Pologna e la Tschechia ha la cumissiun da l'UE gia instradà il zercladur tals pass.

RR novitads 11:00