Siglir tar il cuntegn

Exteriur Ungaria disfà la saiv

L'Ungaria ha puspè disfatg la saiv ch'ella aveva construì al cunfin cun la Slovenia. Quai rapporta l'agentura da novitads ungaraisa MTI. Il ministeri da l'intern ha declerà a Budapest che quai saja stà mo in'emprova. Pir la gievgia ha l'Ungaria cumenzà a construir la saiv.

schuldads fan ina saiv cun fildarom cun spinas
Legenda: Schuldads ungarais vid preparar ina saiv (maletg simbolic) Keystone

Il primminister ungarais Viktor Orban ha ditg durant in inscunter cun ses collega austriac Werner Faymann, che questa saiv saja problematica perquai che la Slovenia tutgia, sco l'Ungaria, tar ils stadis da Schengen. Perquai fissi pussaivel da construir saiv ch'ins po disfar entaifer in di.

Plinavant ha Orban ditg ch'el veglia contractar cun la Croazia davart la controlla al cunfin cuminaivel. La Croazia na tutga betg al spazi da Schengen.

Il venderdì èn passa 8'000 fugitivs arrivads en l'Ungaria, ils pli blers davent da la Croazia. Ils ultims trais dis èn 26'000 fugitivs arrivads en l'Ungaria. Bunamain tut quests fugitivis èn vegnids transportads vinavant al cunfin cun l'Austria, quai rapportan diversas medias.

RR novitads 14:00