Siglir tar il cuntegn
Inhalt

Exteriur Ulteriuras milliardas per la Tirchia

La Tirchia survegn trais ulteriuras milliardas euros per proveder fugitivs da la Siria. I sa tractia da la segunda transcha d'agid, communitgescha la cumissiun da l'UE. Ina milliarda derivia dal budget da l'UE, duas duain ils stadis commembers metter sin maisa.

in policist accumpogna fugitivs en la Tirchia
Legenda: L'UE sustegn er vinavant la Tirchia cun proveder ils fugitivs ord la Siria. Keystone

Il pajament è part da la cunvegna da fugitivs che l'UE aveva suttascrit il 2016 cun la Tirchia. Quella prevesa che l'UE po trametter enavos tut ils requirents d'asil che vegnan a moda illegala sur la Tirchia en la Grezia. Persuenter surpiglian ils stadis da l'UE da la Tirchia fugitivs sirians e finanzieschan l'agid per ils fugitivs che vivan en la Tirchia. Fin ussa ha la Tirchia prendì si 3,5 milliuns fugitivs.

En ina prima transcha aveva la Tirchia gia survegnì trais milliardas euros da l'UE.

Sch'ils stadis da l'UE approveschan la proposta da finanziar ils novs agids n'è anc betg cler. Pajais sco la Frantscha u la Germania èn s'engaschads che las trais milliardas vegnan finanziadas dal tut ord il budget da l'UE.

RR novitads 16:00