Hubertus Heil, il secretari general da la SPD, n'ha dentant betg ditg tgenina finamira che quests discurs hajan.
Discurs bain – dentant «ord respect» per l'uffizi da Steinmeier
Er suenter nov uras sa cussegliar la notg passada na saja anc betg cler, sche la SPD veglia prender en mira danovamain ina gronda coaliziun, ina uschenumnada «GroKo». La SPD saja pronta «ord respect per l'uffizi dal president da la Republica Federala Tudestga» da discutar cun autras partidas.
Ils socialdemocrats avevan discutà avant, sche ed in tgenina furma ch'els veglian porscher sustegn per furmar ina nova regenza en Germania.
Steinmeier na vul betg elecziuns novas
Il president da la Republica, Frank Walter Steinmeier, aveva accentuà la gievgia ch'el na veglia betg elecziuns novas. La testa da la SPD era dentant s'exprimida exact en questa direcziun ed en il medem cunter ina coaliziun gronda. Entant pledeschan intgins commembers da la SPD per l'opziun d'ina regenza minoritara, tolerada da la SPD.
Suenter ch'ils discurs da sondagi tranter l'uniun da CDU/CSU, ils liberals da la FDP ed ils Verds han fatg naufragi, vali da tschertgar ina nova soluziun per furmar ina regenza en Germania.
RR novitads 06:00
