Siglir tar il cuntegn

Exteriur Ulteriur terratrembel en il Mexico

In ulteriur ferm terratrembel ha laschà stremblir la terra en il Mexico, quatter dis suenter il terratrembel ch'aveva chaschunà la mort da radund 300 persunas.

Bleras persunas sin via.
Legenda: Bleras persunas èn suenter l'alarm a Mexico City scappads sin via. Keystone

L'epicenter dal nov terratrembel è stà radund 700 kilometers en il sid-ost da Mexico City ed el ha gì ina fermezza da 6,1. Las autoritads da la chapitala han alarmà ils abitants. Davart da donns u unfrendas na datti anc naginas indicaziuns.

Persunas scappan sin via

Bleras persunas èn a Mexico City suenter l'alarm curridas plain tema sin las vias. Il terratrembel era dentant per bler betg uschè ferms sco il mardi, cura che la terra ha stremblì cun ina fermezza da 7,1, sco in reporter da l'agentura da novitads sda rapporta.

Entant cuntinueschan las lavurs per anc chattar survivents dal terratrembel dal mardi. La speranza è entant pitschna.

RR novitads 16:00