Siglir tar il cuntegn
Inhalt

Exteriur Uffizi american stritga reglas per la «neutralitad da la rait»

En ils Stadis Unids vegn la neutralitad da datas en l’internet lomiada. Quai ha decis l’autoritad da surveglianza da telecommunicaziun FCC piz a cup cun trais cunter duas vuschs.

Ajit Pai avant l'emblem da l'autoritad
Legenda: Il president da la cumissiun da communicaziun americana Ajit Pai è persvas ch'i dettia dapli investiziuns en las raits cun stritgar la neutralitad da la rait. Keystone

Fin ussa valevan las reglas per l’uschenumnada «neutralitad da la rait» che l'anteriur president Barack Obama aveva introducì. Las reglas pretendan da tractar tut las datas tuttina. Uschia na pudevan providers da la rait da telecommunicaziun, sco la AT&T, Verizon ubain era Comcast, betg pretender dapli daners per transmetter las datas pli spert. Ussa bain.

Cundiziun: Transparenza

Suletta cundiziun è ch'ils providers fatschian transparent, a tgi ch’els concedan spertezzas pli autas. Uschia sa mussan interpresas da telecommunicaziun cuntentas cun questa decisiun e speran sin dapli daners per extender las raits. Tenor il president da l'autoritad da surveglianza ch'ha decis, Ajit Pai, vegnia questa decisiun a chaschunar dapli investiziuns en l'internet.

Internet en «classas»

Critichers averteschan gia daditg dad in internet da duas classas. Sche las firmas che porschan servetschs en l'internet stoppian ussa pajar dapli per transmetter las datas, lura favuriseschia quai firmas grondas che possian prestar quai, sco per exempel Google, Facebook, Amazon e Netflix. Plirs stadis federativs en ils Stadis Unids han annunzià da purtar plant cunter questa decisiun.

RR novitads 06:00