Siglir tar il cuntegn
cuntegn

Exteriur UE tira il frain d'urgenza en chaussa fugitivs

Per lung la ruta dal Balcan vul l'Uniun europeica crear 100’000 plazs per dar alloschi a fugitivs. Da quels duain 50’000 vegnir construids en la Grezia. Quai ha declerà il president da la cumissiun da l'UE, Jean-Claude Juncker, questa notg suenter l'inscunter extraordinari a Brüssel.

Jean-Claude Juncker.
Legenda: In pensiv president da la Cumissiun da l'UE: Durant la notg ha Juncker pudì preschentar emprims resultats. Reuters

La regenza ad Athen vul metter a disposiziun 30’000 da quels plazs enfin la fin da l'onn ed ulteriurs 20’000 cun sustegn da l'ovra d'agid per fugitivs UNHCR.

I na possia betg esser ch'umans stoppian durmir sin prads il 2015, e quai da temperaturas fraidas, ha Juncker ditg vinavant.

Nov chatsch da fugitivs en Slovenia

Parallel cun l'inscunter extraordinari a Brüssel ha la Slovenia annunzià in nov chatsch da record da fugitivs. Sulettamain per la dumengia ha la regenza a Ljublijana quintà cun 15’000 novarrivads. Anc mai sajan tants fugitivs vegnids en in sulet di dal pajais vischin Croazia al cunfin sloven.

Ils fugitivs hajan numnà la Germania e l'Austria sco finamira da lur viadi.

400 policists dapli per segirar cunfins da Grezia e Balcan

A l’inscunter è era vegnì concludì, che la Slovenia survegnia entaifer in'emna 400 policists supplementars per dumagnar la situaziun. En ina nova missiun duai l'agentura da protecziun dal cunfin Frontex latiers segirar meglier il cunfin tranter la Grezia, la Macedonia, l'Albania e la Serbia.

Ils participants da l'inscunter èn era s'obligads da chalar cun la politica da laschar passar fugitivs.

RR novitads 06:00