Exteriur - UE e Canada sa dostan cunter ils dazis dals Stadis Unids
L'UE ed il Canada han inoltrà plant tar l'organisaziun mundiala per il commerzi ed annunzià cuntramesiras. Plinavant hajan ins incumbensà il minister da finanzas american d'infurmar il president Trump davart lur quitads e lur trumpada, uschia hai num en ina decleraziun.
Ed er il Giapun ponderescha d'inoltrar plant tar l'organisaziun mundiala per il commerzi. Il minister da finanzas franzos, Bruno Le Maire ha ditg ch'ins haja anc intgins dis temp d'evitar ina guerra da commerzi. Il bal saja ussa tar la regenza americana.
Tar in inscunter dals ministers da finanzas da las set grondas naziuns d'industria han tuts condemnà ils dazis supplementars sin atschal ed aluminium sco illegals e betg acceptabels.
