Siglir tar il cuntegn
Inhalt

Exteriur UE decida mesiras cunter migrants che vegnan da l’Africa

Ils schefs da stadi e regenza da l'Uniun europeica èn sa cunvegnids a Malta sin in plan da diesch puncts. Uschia vulan els impedir en il futur che diesch-millis da migrants pon arrivar da l’Africa dal nord sur la Mar mediterrana en l’Europa.

Bleras persunas sin duas navs
Legenda: Migrants a bord d’ina nav survegnan agid, il november 2016 sin la Mar mediterrana. Keystone

Il plan prevesa spezialmain ina collavuraziun pli stretga cun la Libia. Tranter auter duai la guardia da costa da la Libia vegnir scolada ed equipada tant pli spert. Quella duai cumbatter las bandas da cuntrabandists ch’organiseschan ils viadis en direcziun Europa. En la Libia sezza vul la UE procurar per champs da migrants e fugitivs andants.

Il viadi sur mar cumenza savens en la Libia

La Libia è il pajais da transit il pli impurtant per migrants che vulan vegnir da l’Africa en l’Europa. Sulet il 2016 han passa 180’000 persunas fatg quest viadi privlus sur la Mar mediterrana. Millis da persunas èn najentadas perquai che criminals las avevan transportà sin navs defectas u betg adattadas.

I dat era critica per las mesiras decididas

Organisaziuns caritativas crititgeschan ils plans da l'UE. Ina collavuraziun cun la Libia per sa defender cunter ils fugitivs, tangheschia las valurs fundamentalas europeicas.

RR novitads 15:00