Tranter ils observaturs vala il novelegì Groisman sco «construider da punts». Il nov primminister ha plinavant en egl ina colliaziun pli stretga cun l'Uniun europeica. Groisman è stà il candidat giavischà dal president ucranais Petro Poroschenko.
Arseni Jazenjuk aveva declerà sia demissiun la dumengia ed uschia tratg las consequenzas ord la crisa da la regenza che dura gia dapi mais.
Successur da Grosiman
Il successur da Groisman ed uschia nov parsura dal parlament daventa Andrej Parubij. L’um da 45 onns agiva pli baud a l’ur dretg da la politica ucranaisa. Aifer il parlament represchenta el la partida da coaliziun da la «front populara».
Ministeri da finanzas
Nov minister da finanzas duai daventar Oleksandr Daniljuk. El vegn a remplazzar Natalja Jaresko ch’è naschida en ils Stadis Unids da l’America. L’anteriura banchiera d’investment e diplomata americana aveva a curta vista survegnì il dretg civic da l’Ucraina ensemen cun il post sco ministra da finanzas.
Minsteri d’economia
Er in nov minister d’economia e prim viceprimminister è previs, numnadamain Stepan Kubiw. Fin uss è el represchentant dal president en il parlament. L’anteriur minister d’economia Aivaras Abromavicius era sa retratg il favrer – quai ord protest cunter la corrupziun en il pajais.
RR novitads 14:00