Siglir tar il cuntegn

Exteriur U.S.A. - Daimler en mira da las autoritads

Las autoritads americanas sa fatschentan Suenter il scandal da svapur era cun Daimler. Il concern tudestga haja survegnì dal ministeri da giustia american l'incumbensa, da controllar la certificaziun che reguarda las emissiuns da svapur. Quai communitgescha Daimler sez.

In auto da Mercedes vegn pulì.
Legenda: Mantenair l'image pulit cun tut ils mezzs giuridics - il concern Daimler sa defenda cunter plants collectivs. Keystone

Il concern dad autos ha communitgà la notg passada da vulair cooperar cun las autoritads americanas.

L’incumbensa da l’autoritad da surveglianza americana è ina consequenza da plants collectivs da possessurs americans dad autos , ch’èn vegnì inoltrà il favrer en ils Stadis Unids. Els rinfatschan a Daimler valurs da svapur memia autas.

Cooperaziun gea - cunter plants collectivs dentant defaisa cun tut ils mezzs giuridics

Cunter quellas reproschas sa veglia Daimler defender cun tut ils meds giuridics. En il curs dal scandal tar VW ha Daimler contestà pliras giadas, dad avair en ses autos ina software che manipulescha las valurs da svapur.

Sco VW è era Mitsubishi involvà en il scandal da las valurs manipuladas

La fin d’emna era vegnì enconuschent, che las medemas autoritads americanas hajan era en mira il concern giapunais Mitsubishi Motors. Ils americans vulan infurmaziuns tar autos, ch’èn vegnids vendids en ils Stadis Unids.

Tenor in rapport da la gasetta Sankei pudess Mitsubishi avair manipulà las valurs da svapur dad ulteriurs models sco tar autos electrics. Mitsubishi aveva gia concedì, dad avair duvrà tricks tar tests en connex cun las valurs da svapur.

RR novitads 06:30