Siglir tar il cuntegn
Inhalt

Exteriur Twitter vul daventar pli transparent tar reclama politica

Twitter ha annunzià pliras mesiras per dapli transparenza pertutgant la reclama politica sin lur plattafurma, sur dals inserents e sur dals utilisaturs en mira da la reclama. Uschia suonda Twitter l'exempel da Facebook ch'aveva l'entschatta dal mais communitgà mesiras sumegliantas.

logo e siluettas da persunas
Legenda: Twitter ha era annunzià mesiras per render pli transparenta la reclama politica sin la plattafurma. Reuters

Per meglierar las controllas gia existentas endrizza il servetsch da novitads curtas Twitter ina pagina d'internet speziala, nua ch'ins vesa, tgi che stat davos la reclama e quant ch'igl è vegnì pajà per ella. Quai ha communitgà l'interpresa en in blog. Ultra da quai duai reclama politica vegnir marcada spezialmain.

Il motiv per las mesiras da transparenza tar Twitter e Facebook è la davosa elecziun per il presidi american. Là avevan Twitter, Facebook e Google constatà activitads extraordinarias sin lur plattafurmas. Twitter aveva communitgà la fin da settember ch'els hajan chattà radund 200 profils da la Russia. Cun quels profils saja vegnida influenzada l'elecziun en ils Stadis Unids da l'America.

RR novitads 06:00