Quai ha l'ambassada russa confermà a Cairo sin sia pagina da facebook. Era represchentants da las autoritads egipzianas han declerà che nagin haja survivì l'accident. Tenor l'agentura da novitads russa Interfax sajan tut ils passagiers russ.
L'aviun saja dividì en duas parts. Blers dals passagiers sajan anc liads cun las tschintas da segirtad en ils sezs da l'aviun.
L'aviun dal tip Airbus A-321 era partì da Sharm el-Sheich vers St. Petersburg. Sur la Cipra saja l'aviun sparì dal radar.
Lufthansa ed Air France na sgolan betg sur peninsla Sinai
Entant reageschan las primas societads aviaticas. La Lufthansa e l’Air France, duas da las pli grondas societads europeicas, eviteschan per il mument da sgular sur la peninsla Sinai. Fin che la raschun per la disgrazia na saja anc betg sclerida, sgolian ins enturn la regiun, uschia las societads.
SI ha declerà d'avair sajettà giu l'aviun
En il territori da la crudada da l'aviun è activa la milissa da terror Stadi Islamic. Quella ha entant declerà via Twitter d'avair sajettà giu l'aviun cun 224 persunas a bord.
RR novitads 15:00/20:00