Turistichers da 3 pajais discuteschan davart l'avegnir

En occasiun dal 25avel Forum da turissem da las regiuns alpinas a Mayrhofen en il Tirol, han ils radund 150 participants derivant da l’Austria, l’Italia, la Svizra e la Germania barattà experientschas tranter pèr, e discutà davart il tema principal da l’inscunter: navigar en martgads saziads.

sala da conferenza, a mez ina paraid da projectar, blera glieud guarda sin il referent davanttiers

Legenda da maletgs: A Mayrhofen en il Tirol è il Forum da turissem per regiuns alpinas. RTR, A.Caprez

Il forum dura 3 dis, durant l’emprim di han ils turistichers udì surtut referats e discussiuns davart models che duain manar al success.

Il segund di stattan las pendicularas e las regiuns da skis en il focus. Tranter auter datti in’invista davos las culissas da la meglra destinaziun da skis en la Scandinavia.
Il Forum da turissem da las regiuns alpinas ha lieu alternant mintg’onn en in auter pajais.

Tschertgar da soluziuns ed ideas per generar dapli giasts

“I na va betg dad inventar mintga giada danovamain la roda, mabain da prender ella dapart e megliurar singulas parts da quella”. Quai di Roland Zegg, il cussegliader da turissem a chaschun dal 25avel Forum da turissem a Mayrhofen en il Tirol.

Rolanz Zegg ed in visur cun l'inscripziun Tourismus TFA Forum

Legenda da maletgs: Ins stoppia megliurar singulas parts dal turissem per dapli success manegia il cussegliader da turissem R. Zegg. RTR, A. Caprez

Ils radund 180 participants da las regiuns da las Alps han survegnì inputs en furma da referats e vis models da success ch’i dat gia, per exempel skistar.com en la Scandinavia.

Secret da success

Il secret da success da l’interpraisa svedaisa - norvegiaisa saja la collavuraziun intensiva en las regiuns da skis e surtut la controlla da tut las purschidas ch’il giast tschertga. Vul dir ch’il giast po cumprar via internet cun in’unica carta: l’alloschament, l’entrada en la regiun da skis, pigliar a tschains ils skis ed er pustar la scola da skis en in dals total 5 ressorts. Uschia generescha skistar.com bun 4,2 milliuns dis da skis l’onn.

In tal concept fiss senz’auter er applitgabel en autras destinaziuns di Bo Halvardsson, il manader da gestiun da skistar.com e president dal cussegl administrativ da las pendicularas ad Ursera e Sedrun.

Link sin la pagina uffiziala dal forum