Siglir tar il cuntegn

Exteriur Tura da bus cunter il terrorissem

Ina gruppa dad imams è en viadi cun in bus tras l'Europa. Els vulan uschia metter in segn cunter il terrorissem. Ils imams van lura vinavant en citads, nua che glieud è morta pervi dad attatgas terroristicas. Tranter auter a Berlin, Brüssel e Nizza.

Purtret d'in dals imams iniziants.
Legenda: Hassen Chalghoumi, el sustegna fermamain il project cun il bus. Reuters

Ils 60 imams da differents pajais han cumenzà lur viadi a Paris sin la Champs-Elysées, nua ch’in policist era mort tar in’attatga l’avrigl passà. Là han ils imams lura era fatg oraziun. La dumengia è il bus lura staziunà a Berlin sin il Breitscheidplatz. Là era in terrorist charrà cun in camiun en ina fulla persunas ch'era ad in martgà da Nadal. 12 persunas èn mortas da quest'attatga il december passà.

Suenter cuntinuescha il bus ses viadi en citads ch'èn stadas pertutgadas dad attatgas terroristicas, tranter auter a Brüssel, Toulouse e Nizza. Ils 14 da fanadur, il di da la festa naziunala franzosa turnan ils imams puspè a Paris.

Igl è impurtant che muslims pon s'exprimer per dir che mia religiun n'ha da far nagut cun quests barbars.
Autur: Hassen ChalghoumiImam a Drancy, Paris

L'imam Hassen Chalghoumi haja ditg ch'i giaja qua per in messadi per umanitad e fraternitad cunter il terrorissem. Muslims na stoppian betg sa giustifitgar pervi da terrorissem islamic, ha ditg l'imam ad in emettur franzos. Il terrorissem piglia l'islam sco ostagi.

RR novitads 15:00