Siglir tar il cuntegn
Inhalt

Exteriur Tschients fugitivs scappan da champ en Grezia

Sin l'insla grecca Chios han almain 500 fugitivs bandunà in champ cun forza. L'emprim hajan els taglià la saiv da giatter, lura sajan els sa mess sin viadi en direcziun dal port da l'insla. Quai rapporta la gasetta «Ta Nea» sin sia pagina d'internet.

Fugitivs da Chios e Lesbos spetgan a Piräus sin la distribuziun da mangiativas.
Legenda: Fugitivs da Chios e Lesbos spetgan a Piräus sin la distribuziun da mangiativas. Keystone

Els na sa sentian betg pli segirs da lur vita en quest champ, han ditg ils fugitivs a schurnalists. Uss veglian els sa chasar en in magasin bandunà en il port.

Organisaziun d’agid sa retira

Avant la fugia dals migrants eran la notg passada plirs fugitivs vegnids blessads tar charplinas en il champ da Chios tranter Afgans e Sirians. A medem temp era ina tenda per il provediment medicinal vegnida destruida. Quai ha stimulà l’organisaziun d’agid «Medis dal mund» da retrair lur squadra.

Champ a Chios è surchargià

Il champ da registraziun a Chios ha ina capacitad da 1’200 persunas. Dapi la cunvegna davart fugitivs tranter l’UE e la Tirchia dals 20 da mars tegnan las autoritads là ils novarrivads. Tenor rapports èn quai gia radund 1’500 persunas. En rom da la cunvegna duain fugitivs vegnir manads enavos en Tirchia.

Dumandà dapli policists

Maletgs da video da l’emettur grec «Skai» laschan supponer che l’atmosfera a Chios è extremamain tendida. Las autoritads han dumandà Athen per dapli policists perquai ch’i dat bunamain mintga di charplinas.

Ed er en il champ ad Idomeni en il nord da la Grezia tanschia «ins sbrinzla» per provocar ina situaziun explosiva, rapportan medias greccas.

Naziuns Unidas fan quitads pervi da remanada da fugitivs

Las Naziuns Unidas èn cunter da manar enavos fugitivs da la Grezia en la Tirchia sco quai ch'igl è planisà per glindesdi proxim. Il prim stoppian las garanzias da segirezza per ils umans pertutgads esser en vigur. En domadus pajais dettia quai anc deficits.

I giaja per segirar ch'ils umans en la Tirchia survegnian protecziun internaziunala e sajan segirs da betg vegnir transportads davent. L'UNHCR ha repetidamain exprimì il quità che la Tirchia pudessi transportar fugitivs enavos en l'Afghanistan, l'Iran u l'Irac.

RR novitads 15:00 / 18:00