Siglir tar il cuntegn
Inhalt

Exteriur Tschetschenia: Proteger meglier ils omosexuals

La Russia duai proteger meglier omosexuals en la sutrepublica tschetschena. Quai pretenda l’Organisaziun per la segirezza e la collavuraziun en l’Europa OSCE.

Portrait Putin.
Legenda: La Russia duai s'engaschar per ils omosexuals en Tschetschenia – il president da la Russia, Wladimir Putin. Keystone

La raschun èn rapports davart rapiments e torturas mortalas dad omosexuals en la Tschetschenia. «Las autoritads han da persequitar ils rapports sgarschaivels e tschertgar e chastiar ils culpabels» citescha l’agentura da novitads tudestga DPA il directur dal biro per instituziuns democraticas e dretgs umans da l’OSCE, Michael Link.

Las autoritads localas n’hajan apparentamain betg gronda veglia da prender per mauns l’istorgia. Perquai saja inditgà che la Russia sezza agescha per la protecziun dals pertutgads.

Er las Naziuns Unidas e l’Uniun europeica han condemnà ils abus supponids e pretendan da sclerir ils cas.

RR novitads 08:00