Siglir tar il cuntegn

Header

cuntegn

Exteriur Trump vul franar agid finanzial als Palestinais

Donald Trump vul franar l'agid finanzial als Palestinais. Il motiv: Ils Palestinais na sajan betg pronts per in discurs da pasch.

Il president american Donald Trump è da l'avis ch'ils Stadis Unids pajan als Palestinais plirs 100 milliuns ad onn senza da retschaiver renconuschientscha u respect. Ils palestinais na veglian gnanc negoziar davart d'ina cunvegna da pasch cun l'Israel. Uschia na vesia el betg pertge ch'ils Stadis Unids avessan en futur anc da sustegnair ils Palestinais finanzialmain.

Enfin ch'ils Palestinais na sajan betg pronts da negoziar duain quels vegnir stritgads, ha l'ambassadura dals Stadis Unids tar las Naziuns Unidas declerà a New York. I sa tracta dals passa 300 milliuns dollars cun quels ch'ils Stadis Unids sustegnan in'autoritad da las Naziuns Unidas che s'engascha per fugitivs en il territori palestinais.

Trump smanatscha er al Pakistan

Il glindesdi aveva Trump smanatschà al Pakistan da sistir ils 225 milliuns dollars daners d'agid. Els n'ageschian betg rigurus avunda cunter terrorists. En ses messadi da Bumaun aveva Trump renfatschà al Pakistan da dar refugi a terrorists.

RR novitads 06:00

Artitgels legids il pli savens