«Almain per in temp» veglia Donald Trump sa tegnair vida questas sancziuns, ha el ditg en in'intervista cun la gasetta «Wall Street Journal». El pudess dentant s'imaginar da stritgar questas sancziuns sche la Russia gidia ils Stadis Unids da cumbatter il terrorissem e da cuntanscher autras finamiras impurtantas.
Il president partent Barack Obama aveva decis sancziuns cunter la Russia il december, suenter ch'i era vegnì enconuschent che la Russia duai avair influenzà las elecziuns presidialas cun attatgas da hackers.
Senat dals Stadis Unids intercurescha
Il senat american ha communitgà da vulair intercurir schebain la Russia haja influenzà las elecziuns presidialas cun attatgas da hackers. La cumissiun d’inquisiziun independenta sa cumpona tant da democrats sco er da republicans. Els han il dretg da citar commembers da las regenzas da Barack Obama sco er da Donald Trump en chaussa. Plinavant duaja la cumissiun intercurir relaziuns pussiblas da la Russia cun ils teams dal cumbat electoral.
RR novitads 12:00