Siglir tar il cuntegn

Header

Navigaziun

Purtret da la famiglia Trump.
Legenda: Trump cun sia dunna Melania (cotschen), sia figlia Ivanka e ses schender Jared Kushner. Keystone
cuntegn

Exteriur Trump nominescha ses schender sco «Senior Advisor»

Jared Kushner duai daventar in dals pli impurtants cussegliaders da Donald Trump. Quai ha il stab da Trump confermà.

L'um da sia figlia Ivanka daventa in dals pli impurtants cussegliaders da Donald Trump. Jared Kushner vegn a lavurar ensemen fitg stretg cun il schef dal stab, Reince Priebus ed il schef strateg, Steve Bannon.

Durant il cumbat electoral da Trump era Kushner gia sa fatschentà cun sia strategia digitala. Medias americanas descrivian el sco schef davos las culissas. El saja motivatur decidì e negozieschi, ed el preparia ruassaivlamain il terren e decidia.

El deriva d'ina famiglia gidieua ortodoxa e vala sco cussegliader influent per la politica dal Proxim Orient da Trump. Ils pleds che Trump haja tegnì davart politica da l'exteriur sajan vegnidas fatgas da Kushner.

Il bab da Kushner saja sco Trump en la scena d'immobiglias da New York. Jared Kushner fetschia tenor il «Wall Street Journal» fatschentas d'immobiglias en la valur da radund 14 milliardas dollars. In uffizi en la regenza na sa cunvegnia betg cun sias activitads d'enfin uss.

Sco quai che la «New York Times» haja ditg, planiseschia Kushner da vender ses possess a New York. Las immobiglias ch'el sa fatschentia cun tut, giajan a sia famiglia, ses frar sco era ad in fund ch'è administrà da sia mamma.

RR novitads 06:00