Siglir tar il cuntegn
cuntegn

Exteriur Trump nominescha McMaster sco nov schef da segirezza

Il president american Donald Trump ha nominà il general Herbert Raymond McMaster sco nov cussegliader da segirtad naziunal. La nominaziun da l'um da 54 onns na dovra betg il consentiment dal senat. McMaster succeda a Michael Flynn che ha stuì sa retrair.

Flynn aveva ditg manzegnas al vicepresident Mike Pence ed ad autras persunas da la regenza americana.

«McMaster è in um cun grond talent e gronda experientscha», ha ditg Trump.

Herbert Raymond McMaster è in um renconuschì en circuls militars. El n'ha naginas retenientschas da crititgar vehementamain ses superiurs. Baud en sia carriera ha el crititgà ils generals che han manà las acziuns militaras en il Vietnam.

Autas abilitads strategicas

En rapports dals ultims onns è McMaster savens vegnì en dumonda sco candidat per il post dal cussegliader da segirtad naziunal. Il 2014 è McMaster vegnì numnà dal «Time Magazine» sco ina da las 100 pli impurtantas persunalitads da grond'influenza. Il favurit dal president american per il post era viceadmiral Robert Harward, lez aveva dentant refusà il post.

Il cussegliader da segirtad naziunal a tranter auter influenza sin la politica da l'exteriur americana.

RR novitads 06:00