Siglir tar il cuntegn

Header

cuntegn

Exteriur Trump na conferma betg cunvegna d’atom cun l’Iran

Il president american Donald Trump n’ha betg confermà la cunvegna d’atom cun l’Iran, quai ha il president communitgà a Washington. Il mument èsi dentant anc betg cler cura che las sancziuns americanas cunter l’Iran pudessan puspè ir en vigur.

Sco medias americanas rapportan pudess il president american anc laschar temp fin ch’el introducescha las sancziuns cunter l’Iran. Ellas quintan cun fin a 180 dis fin ch’ina decisiun definitiva da Trump è da spetgar. Il president ha discurrì d’ina cunvegna desastrusa ch’è da principi betg buna e che n’impedescha era betg l’Iran da producir armas atomaras. Trump ha annunzià d’introducir sancziuns severas. L’Iran vegnia a vulair ina cunvegna nova, el saja pront per contractivas.

Cunvegna insuffizienta

Gia dapi mais è la cunvegna en la critica e Trump pretenda che quella duai vegnir tractada anc ina ulteriura giada. Tranter auter pretenda il president american che l’Iran stoppia limitar ses program d’atom era suenter l’onn 2025.

Tge è la cunvegn d'atom cun l'Iran?

Avrir la box Serrar la box

L’Iran ha signà il contract il 2015 cun tschintg stadis da veto da las Naziuns Unidas. Quai èn la Russia, la China, la Gronda Britannia, la Frantscha ed ils Stadis Unids sco era anc cun la Germania. La republica islama dal Iran era sa declerada pronta da renunziar sin il svilup d’armas nuclearas e da dar access a lur ovras atomaras. Sco cuntramesira avevan ils stadis dal vest schlia las sancziuns cunter l’Iran.

Uniun europeica e l'Iran vulan vinavant la cunvegna

Il president iranais Hassan Ruhani ha ditg a la televisun ch'el veglia tuttina sa tegnair vinavant vid la cunvegna. Enstagl d'ina cunvegna cun sis stadis hajan ins ussa ina cun tschintg. La decisiun da Donald Trump na midia nagut. Els na laschain betg tiers che Trump gudognia questa guerra psicologica. Er ha Ruhani renfatschà a Trump da sez mai avair ademplì las obligaziuns da la cunvegna.

Da vart da l'UE hai num ch'ins veglia er vinavant la cunvegna, uschè ditg che l'Iran sa tegnia vi da sias obligaziuns. Er la Svizra ha appellà a tut ils participants da la cunvegna da cuntinuar cun quella. La situaziun per la Svizra na sa midia betg. Ma la malsegirtad en connex cun il commerzi cun l'Iran s'augmentia, uschia èsi da leger en ina communicaziun dal Departament federal d'affars exteriurs.

RR novitads 21:00+

Artitgels legids il pli savens