Siglir tar il cuntegn
Inhalt

Exteriur «Trump ha pretendì stop d'investigaziuns»

L'anteriur schef dal FBI, James Comey engrevgiescha pretensiuns cunter il president american, Donald Trump. Comey conferma che Trump haja supplitgà el da terminar las investigaziuns cunter Michael Flynn, l'anteriur cussegliader da segirezza.

purtret da James Comey, anteriur schef dal FBI
Legenda: James Comey ha da dar pled e fatg avant ina giunta dal senat. Keystone

Quai resulta d'in statement a scrit, ch'il gremi dal servetsch secret dal Senat ha publitgà. En il medem document conferma Comey er ch'il president american haja supplitgà el d'abolir ina part da las investigaziuns davart l'affera da la Russia.

Trump haja pretendì dad el loialitad. Il president american ha fin uss adina refusà d'avair influenzà las investigaziuns.

Naginas investigaziuns directas cunter Trump

Il president american Donald Trump ha reagì cun cuntentientscha sin la decleraziun da l’anteriur schef dal FBI. Tenor ses advocat è Trump cuntent che Comey haja ditg ch’i na dettia betg investigaziuns cunter Trump sez en connex cun l’affera russa.

Sin las renfatschas da Comey n’è l’advocat dal president dentant betg entrà.

Comey vegn oz a dar pled e fatg avant ina cumissiun dal servetsch secret dal senat. Quella vul sclerir sche la Russia ha influenzà l’elecziun dal president l’onn passà.

RR novitads 21:00++