Siglir tar il cuntegn

Header

cuntegn

Exteriur Transporter charrescha en peduns a Toronto – 10 morts

Tar in incident cun in transporter pitschen en la metropola canadaisa moran 10 persunas. 15 ulteriuras vegnan blessadas. Quai ha confermà la polizia.

  • In transporter pitschen è charrà en ina fulla a Toronto.
  • 10 persunas sajan mortas e 15 vegnidas blessadas. Quai conferma la polizia.
  • La polizia ha arrestà il manischunz. Davart ses motiv na datti naginas indicaziuns uffizialas.
  • L'um è charrà sappientivamain en la fulla da glieud, quai ha il schef da la polizia da Toronto confermà.

A Toronto en il Canada è charrà in transporter pitschen en ina fulla da glieud. Sco quai che la polizia ha communitgà, sajan 10 persunas vegnidas mazzadas. 15 ulteriuras sajan vegnidas blessadas. L'entschatta discurriva la polizia da fin a 10 blessads. Entant ha ella pudì arrestar il manischunz dal transporter pitschen. Davart sia identitad u ses motiv n'ha la polizia anc betg fatg indicaziuns.

Accident u act intenziunà?

L'incident saja capità a las 13.27 uras temp local (19.27 uras temp svizzer) en il quartier da North York. I sa tractia dad in quartier bain frequentà cun bleras butias e restaurants. Entant ha il schef da la polizia confermà ch'il probabel delinquent saja charrà intenziunadamain en la fulla da persunas. Las raschuns per ses agir n'èn anc betg cleras. La polizia ha bloccà il quartier. Er il traffic da metro è vegnì interrut.

En la metropola canadaisa era in inscunter dals ministers da l'exteriur G7 ì a fin glindesdi.

RR novitads 21:00++

Artitgels legids il pli savens