Siglir tar il cuntegn
Inhalt

Exteriur Transocean vul davent da la bursa svizra

Transocean na vul betg pli martgadar sias aczias a la bursa svizra. Il concern da furar ieli quinta che la gestiunaria da la bursa svizra SIX vegnia ad acceptar ses plans fin la fin da l’onn, uschia ch'ina dequotaziun da las aczias saja pussibla l'emprim quartal 2016.

Il concern da furar ieli Transocean.
Legenda: Il concern da furar ieli Transocean. Keystone

Las raschuns per quest pass n’ha Transocean dentant betg numnà. La sedia vul il concern cun passa 136 plattafurmas e bastiments da perfurar dentant vinavant salvar a Steinhausen (ZG). Sias aczias duain vinavant vegnir martgadadas a la bursa a New York.

Fin a 3'657 meters sut l'aua

Transocean ha radund 13’000 collavuraturs ed ha fatg l’onn passà ina svieuta da passa 9 milliardas dollars. Il concern è sin l’entir mund sin la tschertga dad ieli e gas. Cun ses bastiment Discoverer Clear Leader po il concern furar suenter ieli en ina profunditad da fin a 3’657 meters sut l’aua.