Siglir tar il cuntegn

Exteriur Trais Svizzers morts en Stadis Unids

En il stadi federativ da Utah sajan trais Svizzers vegnids chattads morts. Quai ha confermà il departament fedral d'affars exteriurs. Ils trais Svizzers sajan stads part d'ina famiglia. La polizia ha menziunà in'ulteriura persuna morta.

Purtret da policists americans.
Legenda: A Utah en ils Stadis Unids hai dà quatter morts. Almain trais dad els èn Svizzers. Reuters

Ils vischins da las persunas chattadas hajan alarmà la polizia perquai ch'els hajan in temp udì nagut pli dad els. La polizia haja chattà ils corps da quatter persunas, tranter auter ina giuvenila da 16 onns ed in buob da 5 onns. Ils quatter morts sajan arrivads il fanadur a Mapleton en il stadi federativ Utah dals Stadis Unids.

Il bab da 45 onns aveva tenor indicaziuns da las autoritads survegnì là ina plazza. Avant avevan el, sia dunna da 42 onns ed ils dus uffants vivì en Svizra. In'examinaziun saja vegnida instradada. La polizia spetgia il mument sin l'analisa da la medischina forensica per pudair reconstruir quai ch'è schabegià.

Per proteger la famiglia n'ha il departament federal d'affars exteriurs betg confermà quellas indicaziuns detagliadas. Il consulat a San Francisco stettia en contact cun las autoritads localas.

RR novitads 14:00