Siglir tar il cuntegn
cuntegn

Exteriur Tozzels morts suenter bova en miniera da jade

Il nord dal Myanmar è confruntà cun grondas bovas che vegnan a val. Sco las autoritads communitgeschan, han almain 97 persunas pers la vita datiers d’ina miniera da jade a Phakant.

Il salvament da las baras saja difficil ed i n'è anc betg cler, schebain ulteriuras persunas sa chattan anc sut las bovas. Quai rapportan represchentants da la regenza locala dal Myanmar (anteriura Burma).

Il privel è enconuschent

Las minieras e las scarpas da deposit en la regiun pertutgada Kachin valan sco fitg privlusas. Qua datti savens bovas. Tenor ina gasetta locala sa chattavan blers lavurers en lur tegias, cura che la disgrazia è succedida.

Fatschenta lucrativa cun pedras preziusas

La fatschenta da jade en il Myanmar vala sco ordvart intransparenta. Ina gronda part da las pedras preziusas vegnan exportadas illegalmain en la China, sco ch’i vegn pretendì. Tenor indicaziuns da l’organisaziun per l’ambient «Global Witness» ha il Myanmar producì il 2014 jade en ina valita da radund 29 milliardas euros.

RR novitads 15:00