Siglir tar il cuntegn
Inhalt

Exteriur Tony Awards per Bette Midler e Kevin Kline

Ils acturs americans Bette Midler e Kevin Kline han survegnì in Tony Award a New York. En il center da la surdada era cler Bette Midler. L'actura ha cun 71 onns gudagnà per l'emprima giada la trofea.

Purtret da Bette Midler.
Legenda: L'actura Bette Midler ha cun 71 onns gudagnà per l'emprima giada in Tony Award. Keystone

Bette Midler ha survegnì il pli impurant premi da teater dal mund sco megliera actura en il musical «Hello Dolly». En ses pled d'engraziament menziunescha ella:

Jeu engraziel a tuts giurors – cun ils blers dad els sun jau propi ida en sortida.
Autur: Bette MidlerActura americana

Kevin Kline è vegnì undrà sco meglier actur en il teater «Present Laughter».

Il premi principal per il meglier musical nov al Broadway ha survegnì il musical «Dear Evan Hansen» - In drama davart in suicidi en ina scola.

Tony Awards

Cun ils Tony Awards vegnan undrads ils megliers musicals e tocs da teater che vegnan preschentads en ils 41 teaters enturn il Times Square da New York cun almain 500 sez. Il premi vegn surdà da var 840 giurors ord la branscha da teater.

Moderà da Kevin Spacey

La surdada dals Tony Awards, che ha cuzzà bain trais uras, ha Kevin Spacey moderà. Blers laudaturs e victurs han crititgà la politica dal president american Donald Trump. Ina gronda part dals prominents han purtà ina mascha blau clera sco segn da solidaritad cun l'organisaziun per ils dretgs dals burgais ACLU che s'engascha era avant dretgira en ils Stadis Unids da l'America per ils interess dals migrants.

RR novitads 07:00