La regenza russa ha renvià tut las renfatschas dad esser involvida en la tissientada dal criticher dal Kreml, Alexej Nawalny. Tenor enconuschientschas da mediciners tudestgs è Nawalny vegnì tissientà cun in tissi da la gnerva da la gruppa Nowitschok.
Tenor il pledader dal Kreml, Dmitri Peskow, na dettia nagin motiv da renfatschar al stadi russ x-insatge. Consequentamain na dettia era nagins motivs per sancziuns cunter la Russia u cunter la pipeline Nord Stream 2 en la Mar da l'Ost. Talas sancziuns avevan politichers tudestgs pretendì, suenter che la tissientada cun Nowitschok era vegnida enconuschenta.
Alexej Nawalny è in dals pli ferms critichers dal president russ, Wladimir Putin. Il team da Nawalny va or da quai che Putin vuleva vegnir liber da l'opponent. L'um da 44 onns è dapi ch'el ha vulì sgular avant duas emnas da la Sibiria a Moscau en il coma. El vegn actualmain tractà a Berlin en la clinica Charité.