Siglir tar il cuntegn
Inhalt

Exteriur Tirchia – Yildirim è confermà

Il parlament ad Ankara ha confermà en uffizi il nov prim-minister Binali Yildirim. Ils deputads han plinavant exprimì lur confidenza envers il nov cabinet da la regenza islam-conservativa AKP uschia rapporta l'emettur CNN Türk.

Yildirim ed Erdogan sesan ensemen en ina stanza.
Legenda: Yildirim è formalmain a la testa dal cabinet - facticamain maina dentant Erdogan la regenza e la partida AKP. Keystone

Yildirim, in confident loial dal president Recep Tayyip Erdogan, era vegnì elegì la dumengia passada sco nov schef da la AKP. Silsuenter era el vegnì incumbensà dal president cun la furmaziun da la regenza. Cun 317 da 550 sezs ha l’AKP ina maioritad confortabla en il parlament. 315 dad els han exprimì lur confidenza envers Yildirim.

Yildirim e ses antecessur Davutoglu flancads da lur dunnas.
Legenda: Il nov ed il vegl - Yildirim (2. da san.) e ses antecessur Davutoglu (3. da san.), flancads da lur dunnas. Keystone

Yildirim succeda ad Ahmet Davutoglu ch'era sa retratg l'emna passada. A Davutoglu era vegnì rinfatschà da na betg avair sustegnì decisamain l’introducziun dad in sistem presidial. Yildirim perencunter ha punctuà differentas giadas che quai duessi esser la prioritad suprema da la nova regenza.

Yildirim è formalmain a la testa dal cabinet – facticamain maina dentant Erdogan la regenza e la partida AKP.

RR novitads 17:00