Siglir tar il cuntegn

Header

Navigaziun

In um protestescha cun chadainas davant la redacziun da la gasetta.
Legenda: La libertad da la pressa sut pressiun - suenter la gasetta «Zaman» la fin d'emna (en il purtet las demonstaziuns) uss l'agentura da novitads «Cihan». Keystone
cuntegn

Exteriur Tirchia – stadi surpiglia agentura da novitads

Durant che la publicitad mira a las tractativas pertutgant fugitivs a Brüssel, vegn activa la Tirchia cunter las medias da l’opposiziun. Suenter la gasetta opposiziunala «Zaman» vegn uss era l’agentura da novitads privata «Cihan» sut controlla dal stadi.

Che «Cihan» vegn sut controlla dal stadi ha decidì ina dretgira ad Istanbul sin dumonda dad in procuratur public. Gasetta ed agentura appartegnan al medem concern da medias, «Feza Gazetecilik».

la pulizia tirca surprenda la redacziun da lqa gasetta opposiziunala.
Legenda: Assagl a «Zaman» – la polizia tirca surprenda la redacziun da lqa gasetta opposiziunala. Keystone

Il president da stadi Erdogan cunter il concern da medias

Al president actual da stadi, Recep Tayyib Erdogan, disturba il concern cun quai che quel stat da strusch ad in opponent dad Erdogan, al preditgant Gülen. Co cha l’agentura da novitads statala, «Anadolu», ha communitgà, haja sustegnì il concern da medias «Feza Gazetecilik» questa «organisaziun da terrur gülenistica». Erdogan rinfatscha numnadamain a Gülen, dad avair fabritgà si structuras parallelas en Tirchia, per al cupitgar.

Buccarè per «Cihan» e «Zaman»

Perquai avevan derschaders cun mandats spezials mess la gasetta «Zaman» e sia schumellina da lingua englaisa «Today’s Zaman» sut surveglianza dad ina societad da fiduziari dal stadi. Quai suenter che la polizia aveva attatgà la redacziun da «Zaman» la fin d'emna passada. Uss vegn la gasetta sfurzada, da seguir a la lingia da la regenza.

La polizia patrugliescha davant la chasa da la centrala.
Legenda: Sut controlla dal stadi - la polizia davant la centrala da la gasetta «Zaman» ad Istanbul. Keystone

La libertad da pressa en Tirchia è malgrà la crisa da fugitivs en focus

La mesira è vegnida crititgada internaziunalmain sco ulteriura attatga a la libertad da la pressa en Tirchia.

Il minister da giustia tudestg, Heiko Maas, ha admonì la Tirchia da na betg limitar la libertad da pressa.

Era il president dal parlament da l’Uniun europeica, Martin Schulz, ha s’exprimì encunter l’attatga a la gasetta «Zaman». Il tema vegnia discutà era a l’inscunter suprem a Brüssel, ha ditg Schulz.

La Tirchia vesa quai auter

Il president minister Ahmet Davutoglu percunter ha renvià al fat, ch’i na sa tractia betg dad ina decisiun da sia regenza islamic-conservativa, ma dad ina da la giustia. Rinfatschas, da limitar la libertad da pressa, renviescha la regenza regularmain.

Tenor atgenas indicaziun lavurian 600 collavuraturas per «Cihan». L’agentura producescha texts, fotografias e videos.

RR novitads 07:00

Las medias «Cihan» e «Zaman»

Fethullah Gulen, in opponent dad Erdogan
Legenda: Il preditgant Fethullah Gülen, in opponent dad Erdogan. Kexstone

La gasetta «Zaman» e l’agentura «Cihan» tutgan tar il concern da medias «Feza Gazetecilik». Quel stad dastrusch al moviment dal preditgant Fethullah Gülen. Gülen è en exil en ils U.S.A.. Fin ad ina dispita era el allià dal president da stadi actual Erdogan. Il moviment da Gülen, Hismet, è vegnì declerà da la Tirchia sco organisaziun terroristica.