Siglir tar il cuntegn

Exteriur Tirchia porta plant cunter satiricher tudestg

Il president tirc Recep Tayyip Erdogan ha inoltrà in plant pervi da insultaziun cunter il satiricher tudestg Jan Böhmermann. Quai scriva la procura publica Mainz sin sia pagina d'internet. I va per ina poesia disfamanta en l'emissiun ZDF Neo Royal da la fin da mars.

Legenda: Guardar il video «Türkei fordert Strafverfahren gegen Böhmermann». Durada 1:54 minutas.
Or da Tagesschau dals 11.04.2016.

Fin ussa era enconuschent che la Tirchia ha pretendì uffizialmain da la Germania ch'ella inostradeschia ina procedura cunter Böhmermann. Gia il suentermezdi è vegnì enconuschent che la chanceliera tudestga Angela Merkel examinescha sch'ella vul laschar tiers il plant cunter il satiricher.

Böhmermann aveva preschentà la poesia en l'emissiun dals 31 da mars. Pliras giadas ha el ditg che na quai saja betg satira, mabain ina critica disfamanta e perquai illegala en la Germania. L'emettur ZDF è sa distanzià da la preschentaziun ed ha stritgà l'emissiun ord ses archiv.

Regenza tudestga en las stretgas

La pretensiun da Ankara a Berlin da s'engaschar per ina perquisiziun penala fa vegnir en las stretgas la regenza. Merkel stat sut il suspect da sa tegnair enavos cun critica vid Erdogan perquai ch'ella dovra la Tirchia per il cumbat cunter ils fugitivs. Ina procedura pussaivla frunta sin skeptica tar las partidas. L'Associaziun dals schurnalists tudestg ha numnà l'andament ina farsa.

Offender organs e represchentants da stadis esters po vegnir chastià en la Germania fin a trais onns praschun u ina multa, cun intenziun disfamanta schizunt fin a tschintg onns praschun.

Uss pir da dretg - Jetzt erst recht

Entant ha era il cabarettist Dieter Hallervorden fatg ina chanzun critica ad Erdogan. Tranter auter chanta Hallervorden: «Ich sing' einfach, was du bist. Ein Terrorist, der auf freien Geist scheisst.» Hallervorden ha publitgà la chanzun sin sia pagina da facebook cun ils pleds «Jetzt erst recht».

RR novitads 22:00