Siglir tar il cuntegn
Inhalt

Exteriur Tirchia: Nagin’annullaziun dal referendum ed arrestaziuns

La Tirchia è vinavant en agitaziun suenter la votaziun: La mesemna la saira ha rapportà l’agentura da novitads statala Anadolu, ch’il referendum constituziunal na vegnia betg annullà. La mesemna la damaun èn vegnids arrestads 38 activists ad Istanbul.

Protesta cun placat cun scrit si Hayir.
Legenda: Hayir (na): Suenter protestas cunter il referendum il mardi ad Istanbul èn vegnids arrestads 38 activists. Keystone

Tenor l'agentura da novitads statala Anadolu haja la cumissiun d'elecziun tirca renvià cun 10:1 vuschs la dumonda d'annullar il referendum constituziunal.

Il mardi aveva la partida d’opposiziun la pli gronda CHP pretendì l’annullaziun pervi da diversas irregularitads. Il president da stadi Recep Tayyip Erdogan aveva gudagnà la dumengia il referendum cun il resultat provisoric da 51,4% mo stretgamain.

Arrestaziuns da 38 activists ad Istanbul

La damaun haja la polizia arrestà suenter protestas cunter il referendum constituziunal 38 persunas ad Istanbul. Tenor ina gasetta critica envers la regenza saja la polizia penetrada oz en damaun en las chasas dals activists.

Tranter ils arrestads sa chatta era il parsura provinzial da la pitschna partida sanestra ÖDP. Quai ha el sez confermà sin twitter.

RR novitads 18:00